زيادة نسبة الطلاق بين الشباب بقلم: سحر نوح

0 162

سألت نفسي كتير عن زيادة نسبة الطلاق بين الشباب وفي طبقه معينه بالتحديد … نلاقي فرح كبير متكلف ملايين وشهر عسل في جزر المالديف والناس تفضل تحكي اسبوع علي الفرح والفستان والأكل والإضاءه والورد والفنان الكبير إلي بياخد فلوس كتير علشان يغني في الفرح ..وبعد كام شهر نسمع عن مشاكل وطلاق … والحقيقه لما فكرت لقيت ان السبب هو المنظره … طبيعي إن مافيش شاب بيبتدي حياته حايقدر يجيب شبكه فيها فص ٣ قيراط ويعمل فرح يتكلف مليون أو اكتر ويكون عنده فيلا في كومباوند تمنه فوق ال ٥ مليون وعربيه بي ام او مرسيدس اخر موديل ودخله الشهري فيه اصفار كتير علشان يعرف كل يوم يجيب هدايا وخروجات وسفريات وحبشتكانات .. وطبعا الاب لو مرتب نفسه بيكون عامل حسابه انه جايب لابنه شوية الأساسيات والبنت بتبقي فاكره ان الشاب اتجوزها وهو معاه مصباح علاء الدين الي حايحققلها كل رغاباتها الماديه واحلامها بالعيشه الفخفخينا وطبعاً هي إتربت انها ماتشيلش اي مسئوليه ولو قررت يوم واتمطعت وقامت سلقت بيضه منغير ماتحرق المطبخ تبقي عملت اإنجاز كبير تستحق عليه الإشاده لان حبيبة قلب مامي وبابي ماجبتهاش ولاده بعد ماظبطط نفسها واتصرف عليها كتير وشفطت ونحتت جسمها ونفخت شفايفها وعملت مناخيرها وودانها وياختي يا جمالها ياختي يا دلالها . تقولوش نجمه عالميه يانااااس ..ومامي كانت بتخلي الداده تعملها اوضتها بعد ماتكون مشلقباها وجايبه عاليها واطيها وهي بتختار الطقم الواو الي حاتخرج بيه … الشاب الي من النوع ده والي ماتعبش في القرش وبابي عمله الشئ ولزوم الشئ وبيبعتله المصروف كل اول شهر لأن هو مدير وبيه في ذات نفسه بيبقي بالنسباله ألي سهل يجي سهل يروح ..وبيبقي هو كمان مطمع لباقي البناتيت الحلوات الكيوتات الي في الشله علي أساس انه ابن بارم ديله والي بيدخل أي حفله ويصرف ويعزم من جيب بابي و الي برضه ماجابتهوش ولاده … وبيجوا قدام اول مشكله حياتيه مابيعرفوش يواجهوها سواء مثلا إن الاب فجآه يفقد ثروته او لاقدر الله يموت او حتي انه يحس بالملل من الجوازه إلي ماتعبش فيها ..إلخ إلخ … ويطلق وبتبقي مصيبه لو كانوا خلفوا …والاهل هنا مابيشوفوش العيب في نفسهم او في تربيتهم لأولادهم . تقعد مع اهل البنت يقولولك في الولد وعن الولد كوارث والعكس صحيح تقعد مع اهل للولد يقولولك ماقاله مالك في الخمر .. وانت لانك ناضج شويه ومشاعرك محايده بتبقي شايف أصل المشكله إن من الاساس جواز عتريس من فؤاده كان باطل وإن هما السبب لأنهم علوا سقف أحلام اولادهم وخلوهم يبتدوا من حيث إنتهي الآخرين ….ماحدش قالك ماتساعدش اولادك بس كمان ماتفسدش حياتهم لازم تنشف عضمهم شويه لازم يعرفوا ان الدنيا بتقول لا وإن مش كل شئ مباح ومتاح وان مش كل حاجه سهله وواجبة النفاذ . لما تجيب لابنك او بنتك وهو في العشرينات عربيه غاليه جدا طب وهو في التلاتينات حايجيب إيه … طب ابنك ده لو يوم حنفية البيت باظت حايقدر يتصرف ويجيب سباك .. ولو عربية مراته عطلت او اتخبطتت حايقدر يروح التوكيل او للميكانيكي ويصلحها … طيب لو المساله بالعكس وابو البنت الي كان شايل الليله علي اساس انه هو الأغني وجايب لبنته كل حاجه وبيساعدها وكأنها ماتجووتش راجل وطالعه رحله تنبسط مع شٌبِه لها زوج هي بقي بعد فتره حاتشوف جوزها راجل وحاتحترم كلمته وبعد مامشاعرها تبرد لان ده الطبيعي بعد فتره من الجواز حاتحس إن جوزها ده مهم وجوده في حياتها وانه موفرلها الأمان وانه سند حقيق يعتمد عليه والا حانمشي بنظام احنا بنشتري راجل وونس بيكمل الصوره وراجل يجي وراجل يروح وكله بفلوسي ….. وطول ماهو لذوذ وفرفوش ونعنوش حانستحمله لكن اول ما ينكد او يغلس حانبيعه ونجيب بديل … للأسف فيه اهل بيجنوا علي أولادهم ومش عارفين الخيط الرفيع بين المساهمه والمساعده بحذر وبين الإفساد .. ومش متخيلين انهم بطريقتهم دي بيحطوا أول مسمار في نعش علاقة أبنائهم الزوجيه بإفسادهم وتدليلهم الأحمق ولا يقدروا يربوا ابنهم علي إنه راجل مسئول وان الجواز مش لعبه ولا ربوا بناتهم علي فكرة مسئوليه تحمل بيت وأعباء حياه وإن الجواز مش فرح وشبكه وشهر عسل ولا ينفع اتجوز شاب واطالبه يعيشني في مستوي اب شقي وتعب سنين كتير علشان يوصل للمستوي ده … وللحديث بقيه

بقلم سحر نوح

بنك مصر مقالات
اترك رد

لن يتم نشر عنوان بريدك الإلكتروني.